Sedema şer tineye


Çend hefte ne PDK'ê êrişek li dijî PKK'ê daye destpêkirin. Ev êriş bi daxuyanî, peyam û gotinan mezin dibe. Yanî mirov kare bêje li ser çapemeniyê şerê xwe dane destpêkirin. Wekî ku PKK nû hatibe avakirin gotinan dikin. Di destpêka salên 1990'î de heman gotin û daxuyanî di televizyonên Tirkan de hebûn. Îro jî heman awayî ango piştî bi 30 salan çapemeniya PDK'ê dike. Li ser avabûn û felsefeya PKK'ê diaxivin. Ji axaftinê jî wêdetir tenê heqaretan dikin. Bi vê yekê re civakê ji şerekî mezin re amade dikin. Li Tirkiyê jî heman tişt çêbûn. Demekê ji bo PKK'ê gotinên herî xerab hatin bikaranîn. Lê dema ku hevdîtin bi Rêber Apo re dihat kirin ew ziman hat guhertin.

PKK çi ye û ji bo çi hat avakirin îro her kes dizane. Ji Arjantînê heta Kanadayê hema bêje her kesî bihîstiye bê PKK çi ye. Lê xuya ye ku li nîvê Kurdistanê ango li Hewlêr, Zaxo û Duhokê PKK nehatiye bihîstin. Çima ez vê dibêjim, ji ber ku PDK û çapemeniya xwe bi vî rengî tevdigerin. Her roj daxuyaniyan didin û PKK'ê reş dikin. Bi taybet jî gerîlayên jin û fermandarên wan dikin hedef. Ma ne ew jin bûn Şengal parastin û Kobanê rizgar kirin. Ew qerasê zilaman ango hêzên PDK'ê bûn reviyan. Li şûna ku hurmetê nîşanî wêrekiya jinan bidin, wan reş dikin. Çeteyên DAIŞ'ê jî herî zêde ji şervan û gerîlayên jin ditirsiyan. Digotin ew naxwazin ji aliyê jinê ve bên kuştin. Me ya DAIŞ'ê fêm kir, lê ya PDK'ê çi ye. Dibe ku ev tirsa wan ji Bêrîtan ango Gulnaz Karataş tê. Di sala 1992'an de dema ku navbera PKK û PDK'ê şer hebû gerîlaya jin Bêrîtan bi sekna xwe ya rûmet hêzên PDK'ê rezîl kir. Lê xuya ye ku li ber xwe neketine û zimandirêjiyê dikin. Dinya alemê li Şengal û Kobanê lehengiya şervan û gerîlayên jin dît. Li ser qehremaniya jinên Kurd bi dehan belgefîlm hatin çêkirin. Di kovar, rojname û malperên cîhanê de bi sedan nivîs hatin nivîsandin û wêne hatin weşandin. Dinya alemê pesnê vê qehremaniyê da, lê derdê PDK'ê çi ye ku vê yekê reş dike.

Rayedarên PKK'ê dehê caran diyar kirin ku şerê wan bi Dewleta Tirk re ye. Û xwestin ku PDK nekeve nava vî şerî. Yanî dibe ku alîkarî nede, lê bila nebe dijber jî. Îro PKK û Dewleta Tirk şerê hev dikin û çend caran li hev jî rûniştin. Dibe ku sibe heman tişt dîsa were kirin. Û eger ev yek pêk were wê pozîsyona PDK'ê çi be ? Îro du teref hene, dikarin li hev bixin û dikarin li hev bikin. Terefê sêyemîn PDK wê li ku bisekine. Eger ev şer bi dawî bibe wê aqûbeta PDK'ê çi be ? Li vê derê dixwazim mînakekê bidim. Di salên 1990'î de eskerên Artêşa Tirk diçin gundekî Botanê û gundiyan li naverasta gund kom dikin. Cerdevanekî Dewleta Tirk jî li wê derê heye û ji fermandarê eskeran dipirse; "Hûn ji bo eskerên xwe yên tên kuştin dibêjin şehîd. PKK jî ji bo gerîlayên xwe dibêje şehîd. Gelo ya kê ji we rast e ? Fermandarê eskeran dibêje ew gerîlayên PKK'ê di ber axa welatê xwe de şer dikin û şehîd in. Lê hûn cerdevan dema tên kuştin ne şehîd in. Ji ber ku ti armanceke we tineye." Ev mînaka wê demê îro PDK anî bîra min. Em dibînin ku PKK jî û PDK jî li ser axa Kurdistanê ne û eger şer derkeve wê PDK doza çi bike ?

Ev şer şerê navbera berxwedêr û dagirkeran e. Li aliyekî PKK heye li ber xwe dide û Kurdistanê diparêze. Li aliyê din Dewleta Tirk heye û Kurdistanê dagir dike. PDK divê terefê xwe diyar bike. Di navberê de çênabe. Derî an vekirî ye yan jî girtiye. Eger PDK dixwaze şer bike hewce nake li ti sedeman bigere, dikare terefê xwe diyar bike û bes e. Hewce bi nûçe û agahiyên derew tineye. Bila bêje ez dixwazim şerê PKK'ê bikim û helwesta xwe diyar bike. Hewce nake ku her roj bi saziyekê daxuyaniyan bide dayîn. Lewma PKK zêdetirî 40 sale li dijî şerê psîkolojîk û derewên Dewleta Tirk şer dike. Ev Dewleta ku artêşa herî mezin a duyemîn li nava NATO'yê ye 40 sal in nikare PKK'ê têk bibe, dibe ku hêzên PDK'ê yên revok dawiya PKK'ê bînin ?

PKK ji destpêka avabûna xwe heta niha rêxistineke şoreşger û canfedayî ye. Ji ber vê yekê ye ewqasî mezin bû û ti carî neket. Li şûna ku PDK bi PKK'ê dadikeve bila li ser Kerkûkê serê xwe biêşînê.

Aslan ASLAN

https://kurmanci.ozgurpolitika.com/nuceya-sedema-ser-tineye-6837

Yorumlar

Yorum Gönder

Bu blogdaki popüler yayınlar

Çend Kurdistan hene?

Resim
Di van rojan de li cîhanê çend bûyerên girîng qewimîn. Li Emerîkayê hilbijartin pêk hat, li Fransa û Awûstûryayê çeteyên Erdogan komkujî kirin. Ev herdu mijar jî Kurdan eleqedar dikin. Lê ya ku yekser bi Kurdan re têkildar e daxuyanî û kirinên PDK'ê ne. Beriya bi 3 rojan serokê PDK'ê Mesûd Barzanî daxuyaniyek da û PKK wekî hêzeke dagirker bi nav kir. PDK'ê jî di daxuyaniya xwe ya dawî de êrişî Hevseroka Konseya Rêveber a KCK'ê Besê Hozat kir. Li vê derê dixwazim tespîteke ku Besê Hozat ji bo PDK'ê kiriye bêjim. Besê Hozat dibêje pirsgirêka heyî di navbera PDK'ê û Kurdan de ye. Ev tespîteke ku bala min kişand û dixwazim ji wê derê werim. Di van salên dawî de daxuyanî û axaftinên rayedarên PDK'ê li ser PKK'ê zêde bûn. Beriya bi çend mehan Serokê Hukûmeta herêma Kurdistanê Nêçîrvan Barzanî diyar kir ku divê PKK ji başûrê Kurdistanê derkeve û biçe bakurê Kurdistanê. Bakurê Kurdistanê jî wekî Kurdistana Bakur bi nav dike. Yanî devera ku ew lê ye Kurdistan e û...
Devamı

Parsekî

Resim
Li Tirkiyê qeyraneke aborî, siyasî û civakî heye. Lê ya ku herî zêde dikeve rojevê qeyrana aborî ye. Ji bo ku em zanibin ev qeyran ji ku derê tê divê em li sedemên wê binêrin. Ya destpêkê ji ber polîtîkayên şer ên Dewleta Tirk e. Erdogan berê xwe daye Iraq, Sûrî, Lîbya û Ermenistanê û çeteyên xwe yên kirêkirî dişîne van deveran. Ji bo xwedîkirina van çeteyan jî pereyekî zêde lazim e. Ev pere jî ji bêrîka gel derdikeve û diçe ji çeteyan re. Lê niha di bêrîka gel de jî tiştek nemaye, lewma di van rojan de ti qîmeta lîrayê Tirk nemaye. Mesela di sala 2014'an de ku wê demê destpêka derketina çeteyan bû lêçûnên Artêşa Tirk 50 milyar bû. Ji wê demê heta niha ev butçe derket 200 milyarî. Dema ku Erdogan berê xwe da Sûrî çeteyên kirêkirî amade kirin. Li gorî agahiyan Erdogan pereyan dide 35 hezar çeteyan. Her meh 300 dolarî dide çeteyekî. Dema ku ev çete tên kuştin jî pere didin malbatên wan. Bi vî rengî her tim di destê Erdogan de çete hene û wan dişîne deverên ku dixwaze dagir bike. Li a...
Devamı

Niha dema wê ye

Resim
Bi fermana serokomarê Tirk Erdogan, di 1'ê Çileyê 2021'ê de li çar zanîngehên Tirkiyê qeyûmên AKP'ê wekî rektor hatin bicihkirin. Ango çar zanîngeh hatin dagirkirin. Yek ji wan zanîngehan jî ya Bogazîçî ye. Lewma jî ji serê salê û vir ve li zanîngeha Bogazîçî ya Stenbolê çalakiyên xwendekaran hene. Xwendekarên li zanîngehê li dijî qeyûmê AKP'ê rabûne ser piyan. Ev çalakî heta niha jî dewam dikin û li gelek bajarên Tirkiyê jî belav bûne. Tirsa desthilatdariya AKP-MHP'ê jî ew e ku ev nerazîbûn bibe wekî ya dema berxwedana Geziyê. Ji ber ku gelek hunermend, rewşenbîr û kesayetên navdar ên Tirkiyê jî nerazîbûna xwe li dijî qeyûmê AKP'ê tînin ziman û piştgirîiyê didin çalakiyên xwendekaran. Rektorê ku zanîngeh dagir kiriye, navê wî Melîh Bûlû ye. Eger em li kesayeta wî binêrin zilamê Erdogan e. Ji sala 2002’yan û vir ve bi AKP'ê re dixebite. Di wê salê de li Stenbolê di avakirina navendên AKP'ê de cih girtiye. Di sala 2009'an de xwe kir bernamzetê şaredar...
Devamı